बीउ भण्डार निर्माण सुरु
२३ वैशाख, म्याग्दी । म्याग्दी जिल्लामा
तीनवटा अत्याधुनिक उपकरणजडित बीउ भण्डार गृह निर्माण सुरु भएको छ । विश्व
बैंकको सहयोगमा कृषि सेवा विभागले ताकम, बाबियाचौर र रत्नेचौरमा बीउ भण्डार
गृह बनाउन लागेको हो । १५ महिनामा सम्पन्न हुनेे बीउ भण्डारमा प्रशोधन,
चिस्यान, भण्डारण र रोग-कीरा नलाग्ने व्यवस्था मिलाइने छ ।
सुरक्षित भण्डार गृह बनेपछि रोग-कीराले
आक्रमण गर्न नसक्ने भएकाले गुणस्तरीय बीउबाट उत्पादकत्व बढाउन सकिने ताकमका
कृषक चिन्तामणि सुवेदीले बताउनुभयो । स्थानीय कृषि सहकारी संस्थामा
आवद्ध कृषकको १५ र सरकारको ८५ प्रतिशत लगानीमा खाद्यन्न र तरकारीको बीउ
भण्डार गृह बनाउन लागिएको हो । अन्नपूर्ण कृषि सहकारी संस्था ताकम, मालिका
कृषि सहकारी संस्था बाबियाचौर र रत्नेचौर व्यावसायिक बीउ उत्पादन सहकारी
संस्थासूग सहकार्य गरेर भण्डार गृह बनाउन लागिएको परामर्शदाता संस्थाकी
फिल्ड संयोजक शान्ता आचार्यले जानकारी दिनुभयो ।
प्रारम्भिक सर्वेक्षणअनुसार एउटा बीउ
भण्डार निर्माण गर्न रु २० देखि ३० लाखसम्म लगानी हुनेछ । गुणस्तरीय बीउ
उत्पादन गरी सुरक्षित भण्डारणमार्फत खाद्य असुरक्षा कम गर्न भण्डार गृह
बनाउन लागेको बताइएको छ । पहिलो चरणमा स्थान छनोट र जग्गा खरिद गरेर
पूर्वाधार निर्माणका साथै कृषकलाई दक्ष बनाउन प्राविधिक ज्ञान दिन थालिएको छ
। कृषकलाई बीउ उत्पादन गर्नेदेखि प्रशोधन र भण्डारण तथा बजारीकरणको ज्ञान
दिएर दक्ष बनाउन बेनीमा १५ दिने तालिम सञ्चालन गरिएको फिल्ड संयोजक
आचार्यले बताउनुभयो ।
भण्डारगृहको व्यवस्थित र दिगो सञ्चालनका
लागि कृषकलाई बीउ उत्पादन, भण्डारण, उपकरणको प्रयोग र बजारीकरणलगायतका
विषयमा प्रयोगात्मक र सैद्धान्तिक ज्ञान दिन थालिएको छ । कृषकले भण्डार
गृहमा मकै, गहुँ, धानलगायत खाद्यबाली र तरकारीको बीउ उत्पादन गर्न सक्नेछन्
। जिल्लामा पहिलोपटक बीउ भण्डार गृह निर्माण हुन लागेको हो । सरकारले
यसवर्ष म्याग्दीलगायत देशका २१ जिल्लामा ३८ वटा बीउ भण्डार गृह निर्माण
गर्न लागेको कार्यालयले जनाएको छ । रासस
No comments:
Post a Comment