राष्ट्रिय कृषि नीतिको तर्जुमा गर्न सरकारसंग माग

राष्ट्रिय कृषि नीतिको तर्जुमा गर्न सरकारसंग माग

२४ वैशाख , काठमाण्डौ । नेपाल कृषि अनुसन्धान परिषद्ले हालसम्म विभिन्न ४५ बालीका २ सय ३३ उन्नत बीउबिजन कृषकमाझ सिफारिस गरिसकेको जनाएको छ । परिषदको २१ औँ वाषिर्कोत्सवका अवसरमा आइतवार राजधानीमा आयोजित कार्यक्रममा परिषद्का कार्यकारी निर्देशक डा दिलबहादुर गुरुङ्ले कृषि सम्बन्धी उच्चस्तरीय अध्ययन तथा अनुसन्धान गर्ने वताउनु भयो ।

उहाँले कृषि क्षेत्रका समस्याको निराकरणका उपाय पत्ता लगाउने तथा राष्ट्रिय कृषि नीतिको तर्जुमाको लागि नेपाल सरकारलाई आवश्यक सहयोग गर्ने वताउनु भयो ।  परिषद्ले सिँचाइको अभावमा धानबालीमा सुख्खा सहनसक्ने पाँच जातिका धानबीउ सिफारिस गरेको छ । त्यस्तै मकैबालीमा गणेश, मनकामना, शितला, देउती जातलगायत आलु, गहुँ जौका जात सिफारिस गरिएका छन् ।
धानमा ६४ दशमलब ६ प्रतिशत, मकैमा १ सय ५२ दशमलब १ प्रतिशत, गहुँमा २ सय २७ दशमलब १ प्रतिशत, जौमा २८ दशमलब ९ प्रतिशत र आलुमा ४ सय ९६ दशमलब १ प्रतिशतले उत्पादन वृद्धि भएको परिषदले जनाएको छ ।    निर्देशक गुरुङ्ले परिषद्ले धान, मकै र गहुँबालीको अनुसन्धानमा गरेको खर्चको प्रतिफल क्रमशः १ सय ५, ८४ र १ सय ३ प्रतिशत पाइएको बताउनुभयो ।
उहाँले आगामी आर्थिक वर्षका लागि अन्नबाली, फलफूल, पशुपक्षी, मत्स्य व्यवसायलगायतमा करिब ६७५ वटा योजना सञ्चालन गरिने जानकारी दिँदै केन्द्रमा एक अत्याधुनिक केन्द्रीय प्रयोगशालाको आवश्यकता रहेको बताउनुभयो । रासस
http://onlinekhabar.com/2012/05/160402.html