३ सय बिघाको केरा नष्ट

काठमाडौ, आश्विन २५ - चितवन पदमपुरका किसानले करिब ३ सय बिघामा फलेका केरा नष्ट गरेका छन् । व्यापारीहरूले बढी नाफा लिन लगानीसमेत नउठ्ने गरी सस्तोमा किन्न खोजेपछि उनीहरूले बारीमै पुरेर केरा नष्ट गरेका हुन् ।
'लगानी उठ्ने गरी मूल्य पाएनौं,' विक्रम अधिकारीले भने, 'त्यसैले बरु मल हुन्छ भन्दै करिब ३ सय रोपनीमा लगाइएको केरा बारीमै पुरियो ।' पदमपुरमा करिब ५ सय घर धुरी किसानले ५ वर्षदेखि केरा खेती गर्दै आएका छन् ।
अधिकारीका अनुसार व्यापारीले शत प्रतिशत नाफा नहुने भएकाले केरा नकिनेका हुन् । 'यहाँ व्यापारीका दलाल केरा किन्न आउँथे र शत प्रतिशत नाफा हुने गरी सस्तोमा पाए मात्र किन्थे,' अधिकारीले भने, 'यसपालि त केरा किन्न कोही आएनन् ।' काठमाडौंस्थित कुलेश्वरका व्यापारीहरूले पदमपुरका केरा सानो भएकाले नकिनेको दाबी गरे । 'पदमपुरका केरा सानो भएकाले बिक्दैन,' व्यापारी चन्द्रेश्वर साहले भने, 'किनेर घाटा मात्र हुन्छ ।' अधिकारी पनि खेती गरेको ३/४ वर्षमा केरा सानो हुने बताउँछन् । 'पहिला पदमपुरको जस्तो राम्रो केरा अन्त पाइँदैन भन्दै व्यापारीहरू बासै बसेर केरा किन्थे,' उनी भन्छन्, 'अहिले केरा केही सानो फल्छ । तर सानो केराको मूल्य थोरै राख्दा पनि फाइदा हुन्छ ।'

फौजी कीराले धानबाला झार्‍यो

नेपालगन्ज, आश्विन ३० - फौजी कीराले बाँके र बर्दियाका एक दर्जनभन्दा बढी गाविसका किसानको धानबाली नष्ट गराएको छ । फौजी कीरा (आर्मी वर्म) उज्यालो हुँदा लुक्ने र सूर्यास्त हुन थालेपछि निस्केर सैनिक शैलीमा एकैसाथ बालीमा पस्छन् । अनि बाला काटेर नष्ट पार्छन् ।
'साँझसम्म पहे‌‌‌लै देखिने धान बिहान हेर्दा पराल मात्र हुन्छ,' आफ्नो तीन बिघा जमिनको पूरै धान सखाप भएको सुनाउँदै मैनापोखर-३ का किसान कमताप्रसाद थारूले भने, 'भित्र्याउने बेलाको बाली पूरै नष्ट भयो । अब के खाने ?' कीराले खानेभन्दा बढी काट्ने हुँदा खेतैभरि धान खसेको देखिन्छ । कीराको आक्रमणबाट किसानहरूमा हाहाकार मच्चिएको छ । नियन्त्रण गर्ने उपाय नभएकाले चिन्तित किसानहरू कृषि कार्यालयमा हारगुहार माग्न धाइरहेका छन् । 'भएको एक बिघाको खेती केही रहेन,' चिन्तित देखिएकी सीतारानी थारूले भनिन्, 'कृषि कार्यालयबाट कुनै सहयोग पाएनौं ।' फौजी कीराले १५ दिनदेखि बाँके र बर्दियाका दर्जनभन्दा बढी गाविस क्षेत्रको धानबाली काटेर नोक्सान पुर्‍याएको छ । बाँकेका महादेवपुरी, कचनापुर, परसपुर र इन्द्रपुरमा फौजी कीरा फैलिएको छ । कीराको प्रभाव बर्दियाका मैनापोखरा, कालिका र महमदपुरका खेतमा पाकेको र पाक्न थालेको धान कीराले सखाप पारिरहेका छन् ।

गाई पालेर २१ वर्षमै सफल

Lila Nath Ghimire
काठमाडौं, आश्विन २१ - उनी भर्खरै २१ वर्ष लागेका छन् । उनको व्यावसायिक प्रगति भने परिपक्व व्यक्तिको भन्दा बढी छ । ऋण गरेर गाईपालन सुरु गरेको एक वर्ष नपुग्दै उनले दूध बेचेर मासिक झन्डै १ लाख रुपैयाँ कमाउन थालेका छन् ।
युवा स्वरोजगार कार्यक्रमसँग ऋण लिएर गत वर्ष सुरु गरेको व्यवसाय अपत्यारिलो किसिमले फस्टाएको छ । मामाले दिएको बाच्छी पालेर सुरु भएको उनको व्यवसायमा सानाठूला गरी २९ वटा गाई थपिएका छन् । व्यवसायमा उदाहरण प्रस्तुत गरेबापत उनले शुक्रबार राजधानीमा गभर्नर युवराज खतिवडाको हातबाट ५ हजार रुपैयाँ पुरस्कार पाउन सफल भए । कृषि सहकारी केन्द्रीय संघका तर्फबाट नमुना कृषि उद्यमीका रूपमा उनलाई दोसल्ला, सम्मानपत्रसहित सम्मान गर्दा हलमा उपस्थित हजारौं सहभागीले जिब्रो टोके । लामो समय ताली बजाएर उनलाई प्रोत्साहन गरे ।